CM Lalduhoma chawimawina Tualpui ah nei dawn, a lim siam hawn nghal tum

by Editor

Tualchhung News

ZORAM TODAY| Aizawl 2nd June, 2024 (Sun): ZPM hotu, Chief Minister Lalduhoma chu June 7, 2024 Zirtawpni hian a khua Tualpui Khawtlangin chawimawi an tum a, hemi atan hian CM Chawimawina Organising Committee dinin programme pawh an peih fel tawh a, a lim an siam pawh he hunah hian Adviser to Chief Minister Er. Ginzalala chuan a hawng dawn a, he programme host tur hian Baryl Vanneihsangi, MLA chu ruat niin tarlan a ni.

Lalduhoma chawimawina hun ah hian tlang ruai siam a ni bawk dawn a, zaithiam eng emawzat an zai ang a, khawtlanga tlawmngai pawl hrang hrang hruaitute'n thu an sawi bawk ang.

He hun hmang tur hian ZPM party chu an President Lalliansawta hovin an kal dawn a, thu a sawi dawn bakah; Chief Minister Lalduhoma, Minister pa li- PC Vanlalruata, F. Rodingliana, Prof. Lalnilawma, Lalnghinglova Hmar; Govt. Deputy Chief Whip W. Chhuanawma te'n thu an sawi ang. Adviser to CM Er. Ginzalala leh ZPM MLA leh party worker thahnemtak an tel dawn nia hriat a ni. Organising Committee te programme siamin a tarlan danin hun hman chhung hian Chief Minister's Relief Fund thawhlawm bawm an dawh dawn a, he huna telte thahnemngai taka thawh theuh turin Organising Committee chuan a ngen nghal bawk, an ti.